Muestra primera seduta

De los 15 Shadarim, 10 de mozotros estuvimos endjuntos dia i noche avlando de muestros butos komo delegados de la Autoridad Nasionala del Ladino i reprezentado muestras komunidades i los menesteres de kada una de eyas.

Tamar Alexander, direktrisa de la ANL tomo palavra al empesijo de la asamblea i avlo de la importansa de esta inisiativa i la razon por la kuala su komite egzekutivo eskojio kada reprezentante. Despues, Eliezer Papo mos avlo sovre el biervo Shadar (abreviasion tradisionala ke se meldava komo SHaliah De Rabanan, o emisario de los rabinos de Eres Yisrael), i la idea de uzar este titolo para los delegados de la ANL (SHaliah De la Reshut, o emisario de la Autoridad). Bryan Kirschen, direktor de los Shadarim, avlo de ande i kuando empeso esta insiativa – sinko anyos atras kuando Yitzhak Navon i Moshe Shaul dainda eran los prezidentes de la ANL.

Antes de las mezas redondas, avia unas kuantas avlas sovre la lingua: El hal del Ladino (Aldina Quintana), Los Shadarim de una vez (Alisa Meyuhas-Ginio), i El djudeo-espanyol de Maroko (Yaakov Bentolila). Avra mas konversasiones sovre la haketia i la importansa de inkluir un/a Shadar de esta varieta de la lingua.

Avia mezas redondas de los Balkanes (Eliezer Papo, Berta Romano, Katja Šmid, Jagoda Večerina), de Turkiya (Henry Çiprut, Can Evrensel Rodrik, Karen Sarhon), de las Amerikas (Bryan Kirschen, Daisy Braverman, Liliana Benveniste, Marcelo Benveniste), i tambien de Israel (Tamar Alexander, Fina Aronovitz, Sara Halfon Inbar, Albert Israel, i Kobi Zarko). Moshe Shaul i Zelda Ovadia tambien estuvieron kon mozotros durante muestra asamblea, ke fue una onor para todos. Kada persona avlo de las komunidades sefaradis de su sivdad/paiz, indemas de los prodjektos ke se estan realizando agora en/para la lingua. En la tadre, avia una prezentasion sovre una mueva edision (kompilasion) de Pirke Avot por Ora Schwarzwald, kon avlas de Shmuel Rafael i Dov Hacohen. Afilu kantimos unos versos endjuntos kon Karen Sarhon a la fin de la prezentasion.

El viernes, durante el dia, kaminimos por la sivdad vieja de Yerushalayim i Eliezer Papo mos konto muncho sovre la istoria de los sefaradim. Munchos de mozotros konosemos a Eliezer, ma para los ke no lo konosemos, es una maraviya de benadam: una ansiklopedia. Tambien vijitimos los kuatro kales sefaradis, ande el prezidente del konsilio de la komunita sefaradi, Abraham Haim, mos arresivio. Noche de shabat, despues de kabalat shabat senimos endjuntos i kantimos munchas kantikas.

La kava parte del program fue un enkontro entre todos los Shadarim ande avlimos de komo puedemos ayudarmos, kolavorar, i estar en kontakto kon la ANL. De estos haberes, tenremos ke eskrivir otrun reportaje asigun todo lo ke tenemos en muestros tefteres. Kale dizir ke muestro grupo no tiene la intension de krear muevas reglas o dizirvos komo avlar o eskrvir vuestra lingua. Se formo este grupo para muchiguar los esforsos sovre / en la lingua i ambezarmos del pasado para dirijirmos en el avenir.

Dos kozas mos vienen al tino de los kualos tenemos muncho orgolio: 1. La direktrisa de la ANL disho ke es la primera vez ke un enkontro de este modo tiene afitado entre la ANL i de la galut sefaradi de avlantes del ladino, i 2. Eliezer Papo (entre otros) disho ke “izimos istoria” avlando eksklusivamente en ladino durante toda la asamblea. Indemas de todas las avlas en la lingua, uzimos la lingua demanyana matrana fin a la noche. Kere dizir ke mos despertimos avlando la lingua durante el desayuno, durante las avlas ofisialas, kuando avia diskusiones en los ke (no) estuvimos de akodro, kaminando i avlando en la sivdad, aziendo shakas, i ambezandomos biervos ke no konosiamos de otros dialektos o afilu kreando biervos muevos para pueder avlar de kualker sujeto. Profitimos de muestro tiempo endjuntos, i por siguro va tener ermanos. A los ke partisiparon, vos rengrasiamos i esperamos ke es solo el empesijo de la konversasion.

Meldar mas:

 

Atadijo 1: Times of Israel

Atadijo 2: El Amaneser

Atadijo 3: Esefarad

Deslizar arriba